Allabaddarí Fransí

Nóg að gera í skipulagningu ferðalaga, þessa dagana.  Glöggir lesendur sjá það strax að þarna er talað um ferðalög í fleirtölu.  Jú, annað ferðalag virðist vera í uppsiglingu í haust.  Þannig er mál með vexti að það eru víst ein fimm ár síðan ég fór á frönskunámskeið og kynntist þar 9 skemmtilegum konum.  Námskeiðið var haldið á Ile d’Olerone í Frakklandi og var bráðskemmtilegt í alla staði. Þarna eyddum við viku og skipunin var að ekki mætti tala annað en frönsku nema í undantekningartilfellum.  Hér þarf að taka það fram að engin okkar var neitt sérlega sleip í frönsku.  Svo gerðist það að árið 2004 tókum við okkur saman, fjórar úr þessum hópi og fórum aftur til Frakklands.  Í þetta skipti leigðum við okkur hús og bíl og eyddum heilli viku á þjóðvegum landsins (ja, meira og minna).  Það var ekki leiðinleg ferð.  Án þess að ýkja er óhætt að segja að þó ýmsir óvæntir hlutir hafi gerst, þá var verulega gaman, mikið hlegið og spekúlerað.  Við þessar 4 sem fórum höfum passað það að láta hinar sem eftir sátu vita, hvað við skemmtum okkur svakalega vel. 

Jæja, í dag gerðist það að alls sjö konur úr þessum hópi hittist til að skoða möguleika á að leigja sumarhús í Frakklandi í haust og spjalla almennt um það hvað svona ferðir eru skemmtilegar.  Nú er svo komið að við höfum ákveðið að hittast einu sinni í mánuði til skrafs og ráðagerða varðandi sumarhúsaferð til Frakklands í haust!  Að sjálfsögðu lagði ég til að næsti fundur verði haldinn með fjarfundabúnaði, svo ég geti fylgst með þróun mála úr annarri heimsálfu.  Ég má ekki missa af neinu.

Athugasemdir

[Guðrún Eggertsdóttir, 23.2.2007 kl. 15:33]

Já, finnst þér ekki?  Það er svo nauðsynlegt að hafa alltaf eitthvað til að hlakka til og enn betra ef það eru margir atburðir.  Frakklandsferðin er reyndar ennþá bara á teikniborðinu en ferðahugurinn er samt kominn í stelpurnar!